踏入第 4日算是最後一天在Resort休息下,而全日節目主要是休休閒閒陽光沙灘為主。中午同下午天氣算咁多日以來最多陽光的一天,10點半落Resort食早餐,之後在Resort對出沙灘漫步去另一邊的沙灘,係香港很少機會漫步沙灘,風景好靚,帶點涼風不算太熱。

之後行回Resort泳池及沙灘哂下太陽,哂到熱辣辣就跳落泳池游下水,Resort個泳池都幾大,沙灘椅上全是外國人,俊男美女都有幾對,外國人真係好識得享受人生,香港人真是要學習多一些。玩到1點又lunch 時候,回Resort沖涼換衫出Town搵食。
 
 





蘇梅主灘 Chaweng Beach

出到 Town 天氣好好,搵了間 KHAOSAN 食lunch,又再一次叫了一個煎蛋海鮮炒飯,加一個冰凍椰青,埋單 315 baht (約$80)。食飽又要去運動下,前3日都無正式去蘇梅主灘 Chaweng Beach 游水哂太陽,今日仲唔同太陽伯伯打交道,落到沙灘勁舒服,整個Chaweng Beach 由頭到尾真係好長,長過香港淺水灣一倍有多。我坐在沙灘倚上勁舒服,望下天、望下海、望下沙灘上泳客、望下沙灘上小朋友、再望下沙灘上的著無上裝鬼妹。在沙灘影了很多相,之後見到有小販檔擺賣,就去買了一串燒魷魚及一個超甜青芒果。買完仲同個小販影番張相留念。








聰明小狗

蘇梅島上有很多貓貓狗狗,而沙灘更有好多狗跑來跑去,有隻狗超醒目。話說我買完小販檔燒魷魚,有隻狗好醒目聞到燒魷魚的香味,隻狗就慢慢行到我附近,它的姿態好友善,還裝出一副楚楚可憐模樣,我們看見就忍不住餵了一片給它。





之後,隻狗食完一片可能覺得好好味,它便打坐我們隔離的日本仔碟燒魷魚主意,個日本仔買了好多燒魷魚送啤酒,一碟燒魷魚就放在地上,原本以為這隻狗會靜俏俏偷食,但它原來有更高的招數。它不停在日本仔及燒魷魚附近行來行去,一時望下碟燒魷魚,一時又望下個日本仔有無反應, 它見日本仔無意識給 魷魚,便坐在燒魷魚隔離,不停望不停望引日本仔注意,之後它終於出?招,它趴在碟燒魷魚前面,成個狗鼻對住碟燒魷魚,再擺出一副好想食的樣子,我們同日本仔都不禁笑起來,最後日本仔當然要奉上燒魷魚,這隻狗真的很可愛很聰明。






有驚無險

在 Chaweng Beach 玩到4 點就要返 Resort 沖涼換衫,準備下一程去睇日落的 Big John Restaurant。點知撘篤篤個程出了事,我們與司機講好了回Nora Beach Resort,他示意OK,但車行到中途發覺與我們平時回Resort的路有所不同,於是問下車內的當地人,發覺這架車原來要兜一個大圈,尾站才到我們間Resort,因為我們要趕住返Resort 去Big John Dinner,又約了專車來接我們,遲到的話好麻煩,結果我們立即下車俾了幾十 baht,轉撘的士返 Resort,好彩最後都趕得切。






期待已久

一直期待這程 Big John Dinner 會是整個旅行其中一個重要環節,可惜天氣關係未能欣賞最美麗的蘇梅日落,有點遺憾!前兩天在 Resort 已拜託職員代我們打電話訂好位,由 Resort去 Big John專車接送費用都幾貴要 750 baht (約$180) ,而撘的士會更貴,最初計劃渣電單車去,一來佢唔識渣,二來車程都幾遠要 45分鐘以上,所以最後決定撘Big John專車去。5:00點車到了,由 Resort 東面去到西面,沿途經由南面去,回程就由北面返,來回車程將整個蘇梅島走了一周。






日落餐廳

去到 Big John 坐一張面向180度大海的坐位,隱約見到微薄日落,雖然未能看到最好的日落,但始於都算去過。嘆了一杯椰子冰,由天亮食到天黑, 餐廳內只有 4張客人,十分寧靜舒服,間中台上有舞蹈表演。食物方面算一般,我們叫了一條鮮魚、炒通菜、炸蝦餅、海鮮炒蛋飯及BBQ 燒大蝦,埋單 1040 baht (約$250,加埋來回接送 $180 ,一共$430 ,這餐真是欠了一個日落,慘痛!)




食完上車回程 時個天落好大雨,好彩剛才食飯無落雨。由蘇梅北面返 Town 車程都要50分鐘,途經Nathon夜市入面全部是要小食攤檔。全程去 Big John 可以環島遊一次都幾好,經過好多當地人住的地方,大多房屋都好簡陋,有些還是木屋舊區。






Swensen's 雪糕店

到了 Town 就去了 Swensen's 食雪糕,每人叫了一杯雪糕合共 185 baht (約$45) 大大杯都食唔哂。食完原本打算再去 My Friends做body Massage,可惜太大雨關係加上行雷閃電,大家便改回返Resort 。返到Resort 我們必須步行一段1分鐘路先入到屋,天氣越來越壞,行好大聲雷同閃電,某人要掩飾自己驚行雷閃電之意,竟然提出在大堂Bar 飲野,仲要強調現在是 Happy Hour 好抵飲喎,我咁醒目當然知乜事,佢一向膽小到爆燈,我同佢講若果咁短路程都俾雷劈真係抵死!佢立即咀妙妙又話外國有個女仔拎住把傘俾雷劈中死左,多多借口想唔行,笑死我哈哈!我就一開傘叫佢快行,結果咪安全到步,我要給十個搞笑俾佢囉!返入屋後,諗住係自己個泳池游多次夜水,但諗諗下出面仍行雷閃電,一陣俾電劈落水我咪玩完博唔過(係咪好雙重標準呢我),結果執哂行李1點左右就去訓,因為明天要朝早6:30am起身去機場。